Բրիտանական խորհուրդը հայտարարում է լուսանկարչական ծառայությունների ընդունման մրցույթ, որի արդյունքում ընտրված մասնագետը լուսանկարչական ծառայություններ կիրականացնի «Արարելով ապագան» ծրագրի շրջանակում։ Աշխատանքի նպատակն է փաստագրել Հայաստանում արհեստագործական նմուշների ու կիրառական արվեստի գործերի, դրանց ստեղծման  և հեղինակների մասին իրական պատմություններ` լուսանկարների միջոցով։  

Ընտրված լուսանկարչին աշխատանքից առաջ կուղարկվի գնառաջարկի հարցում, ինչպես նաև կտրամադրվի առաջադրանքի ամբողջական ուղեցույց: Նախնական  հայտների համար կարող են դիմել պրոֆեսիոնալ լուսանկարիչներ, ովքեր աշխատանքային փորձառություն ունեն արհեստագործական ոլորտում և կարող են ներկայացնել աշխատանքներ ներքևում նշված թեմաներից առնվազն մեկով։ 

Ի՞նչ նախագծեր կարող են մասնակցել մրցույթին 

Նախնական հայտերի ընդունման ընթացքում ակնկալում ենք ստանալ լուսանկարչական պատմություններ`

  • արհեստագործակական նմուշների,  ձեռագործ աշխատանքների, գեղանկարչության  և  կիրառական արվեստի այլ գործերի, ներառյալ գորգագործության, դարբնագործության, խեցեգործության, քանդակագործության, ավանդական զարդանախշերի, ներկելու և դաջելու հետ կապված արհեստների, տիկնիկագործության, մետաղի և փայտի գեղարվեստական փորագրման (ցանկը շարունակելի է)։  
  • վարպետ-ստեղծագործողների, արհեստավորների լուսանկարներ` աշխատելիս, ստեղծագործելիս, 
  • արհեստանոցներ, աշխատանոցներ, արհեստագործական ստուդիաներ աշխատանքային միջավայրում։ 

ԻՆՉՊԵ՞Ս ԴԻՄԵԼ

Մասնակցության  համար անհրաժեշտ է ուղարկել հետևյալ տեղեկություններն ու աշխատանքները

  • Լուսանկարչական նախագիծ/ֆոտոպատմություն, որը կարող է ընդգրկել նախկինում կատարված նմանատիպ աշխատանքներ` առավելագույնը 8 լուսանկար, հնարավորինս բարձր որակի (մինիմալ 1024 կետերկարություն): Լուսանկարներն ընդունվում են մեկ ամբողջական  pdf ֆայլով, որի ընդհանուր ծավալը չպետք է գերազանցի 5 մեգաբայթը։
  • Լրացնել էջի ներքևում կցված գրանցման հայտը, որը ներառում է ֆոտոպատմության նկարագիրը (առավելագույնը 200 բառ), յուրաքանչյուր լուսանկարի մակագրությունը:
  • Գրանցման հայտը էլեկտրոնային նամակով և ֆոտոպատմությունը կից փաստաթղթով ուղարկել armine.bachachyan@britishcouncil.am էլեկտրոնային հասցեին։

Դիմումների վերջնաժամկետը 2019 թվականի նոյեմբերի 5-ն է: 

Հայտերի ընդունման կարևոր դրույթներ

  • Մասնակիցը  երաշխավորում է, որ ինքն է հանդիսանում ներկայացված աշխատանքի հեղինակը և հեղինակային իրավունքի կրողը։ 
  • Չեն դիտարկվի այն լուսանկարները, որոնք չեն համապատասխանում առաջարկվող թեմային:
  • Լուսանկարները պետք է ենթարկված լինեն նվազագույն մշակման` առանց համակարգչային հատուկ էֆեկտների կիրառման։ 
  • Մրցույթին ներկայացված լուսանկարները օգտագործվելու են բացառապես սույն ծառայությունների ընտրության համար և չեն կարող օգտագործվել այլ նպատակներով։

«Արարելով ապագան» ծրագրի մասին 

Արարելով Ապագան» (Crafting Futures) ծրագիրը, որն աջակցում է արհեստագործության ու կիրառական արվեստի զարգացմանն ամբողջ աշխարհում։ Ծրագրի երկարաժամկետ նպատակն է նպաստել տնտեսական, սոցիալական և մշակութային ոլորտների զարգացմանը՝ գիտելիքի փոխանակման և ռեսուրսների հասանելիության ընդլայնման միջոցով։

Ծրագրի նախագծերը միտված են վարպետների մասնագիտական զարգացմանը՝ հետազոտությունների, համագործակցության և կրթական միջոցառումների ճանապարհով։ Ծրագրի շրջանակներում մասնագետները հնարավորություն կունենան ծանոթանալ այս ոլորտում Մեծ Բրիտանիայի լավագույն փորձին, բարելավել գիտելիքները և արդյունքում` ընդլայնել գործունեության իրենց շուկան և ձեռք բերել նոր շահառուներ: