Ստեղծարար միտք

«Ստեղծարար Միտք»: Բարձրագույն կրթության ձեռներեցության ծրագիր

«Ստեղծարար Միտքը» (Creative Spark) հնգամյա նախաձեռնություն է, որը նպատակ ունի նպաստել ստեղծարար ձեռնարկատիրական կրթության զարգացմանը՝ աջակցելով այս ոլորտում Միացյալ Թագավորության և ծրագրի մասնակից յոթ երկրների, ներառյալ Հայաստանի ուսումնական հաստատությունների միջև միջազգային համագործակցության ձևավորմանը: Ծրագիրն իրականացվում է Բրիտանական խորհրդի կողմից Կենտրոնական Ասիայում (Ղազախստան, Ուզբեկստան, Ղրղստան), Հարավային Կովկասում (Ադրբեջան, Հայաստան և Վրաստան) և Ուկրաինայում: 

Բարձրագույն կրթության բարեփոխումներին աջակցելու և տարածաշրջանում գործազրկությունը նվազեցնելու նպատակով Բրիտանական խորհուրդը կօգտագործի Միացյալ Թագավորության ձեռնարկատիրական կրթության փորձը` կազմելու և տրամադրելու ուսումնական ծրագիր, որը կաջակցի ավելի քան 10,000 ուսանողի:  

Ծրագրի երեք հիմնական բաղկացուցիչներն են.

1. Ծրագրում ներգրավված երկրների և Միացյալ Թագավորության համալսարանների ու ստեղծարար ոլորտի հաստատությունների միջև միջազգային գործընկերության հաստատում, որի նպատակն է ձեռնարկատիրական կրթության զարգացումն ու ստեղծարար կենտրոնների հիմնում: 

2. Ուսանողներին և ստեղծարար ձեռներեցներին համապատասխան հմտությունների ուսուցանում՝ մտքերի և փորձի փոխանակման փուլից մինչև բիզնեսի մեկնարկ ու մտավոր սեփականության պահպանում: 

3. Ձեռներեցության թեմատիկ անգլերենի ուսուցում առցանց դասընթացների միջոցով, այդ թվում Զանգվածային բաց առցանց դասընթացների (ԶԲԱԴ) հարթակում: